രാരീരം പാടി ഉറക്കീടാം
എന്നാരോമലേ നിന്നെയെല്ലായിരവിലും
രാവേറെയാകുമ്പോള്‍ രാക്കുയിലുറങ്ങുമ്പോള്‍
രാവുറങ്ങാതെ ഞാന്‍ താരാട്ട് പാടിടാം
നിന്‍ സുഖ നിദ്രക്കായെന്നും ത്യജിച്ചിടാം
എന്‍ നിദ്രയെന്നുടെ പൊന്നോമല്‍ പൈതലേ
നിന്റെ കനവുകള്‍ എന്നും തെളിഞ്ഞീടാന്‍
എന്റെ കിനാവുകള്‍ക്കവധി ഞാന്‍ നല്കീടാം
എന്നോമലേ നിന്‍ പുഞ്ചിരി കാണുമ്പോള്‍
എന്നാത്മ ദുഃഖങ്ങള്‍ എല്ലാം മറന്നിടും
എന്നും നിന്‍ ചെഞ്ചുണ്ടിലൂറുന്ന ശിഞ്ചിതം
എന്‍ നെഞ്ചിലേറ്റുന്നു വാത്സല്യത്തേന്‍ കടല്‍
അമ്മിഞ്ഞപ്പാലിനായെന്നുണ്ണി കേഴുമ്പോള്‍
അച്ഛന്റെ മാനസമാകെയുഴറിടും
നീയാകും മുത്തിനെ തീരത്തണച്ചിട്ട്
നീരിലേക്കാഴ്ന്നുപോയ് ചിപ്പിയാമമ്മ
ഏകാന്തമാമെന്‍ ജീവിത യാത്രയില്‍
ഏകമാം പ്രത്യാശ നീ മാത്രമല്ലേ...
അച്ഛന്റെ മിഴിയിലെ അവസാന നാളവും
അണയുന്ന നാള്‍ വരേ കാത്തിടാം പൊന്നേ
No comments:
Post a Comment